અમે મોટા થાશું
ભલે નાનાં નાનાં બાળ,
અમે આજે રે કાલ,
અમે મોટાં થાશું ને જગ દોરશું!
ખડતલ શરીર, મન મોટું બનાવશું,
હૈયામાં હિત બધી દુનિયાનું ધારશું;
સાચાં માનવ બનીને જીવતર જીવશું! — અમે૦
ઊંચ-નીચ ભેદો આ દુનિયાના ટાળવા,
નાતો જાતો ને ધર્મ વાડાઓ તોડવા,
બધી શક્તિ અમારી વિશ્વચરણે ધરશું! — અમે૦
જગનાં અંધારાંને દૂર દૂર હાંકવા,
સાચા તે જ્ઞાનનો દીવો પ્રગટાવવા,
અમે જાતે સળગી ઘર ઘર ઘૂમશું! — અમે૦
પૈસાને જોરે આજ માનવી મપાય છે,
કોઈ કરે કામ, કોઈ બેસીને ખાય છે,
કરી સર્વોદય, સાચો સમાજ રચશું! — અમે૦
— પૂનમચંદ શાહ