મર્મર/શરદ સંવેદન
Jump to navigation
Jump to search
શરદસંવેદન
શી ખીલી શરદની રાત્રિ!
મલકાવે મુખ મૃદુગાત્રી;
ચઢી ચંદ્ર રહ્યો આકાશે
સ્મરનો સલૂણો સહયાત્રી.
ખીલી રહ્યાં કુમુદ કાસારે
ન્હાતું જગ જ્યોત્સ્નાધારે;
સૃષ્ટિ જાગી રહી સારી
કો અણદીઠના અણસારે.
રમણીરાસની રસતાલી
કંકણની રણક મતવાલી;
પીતાં ન ધરાતા પ્રાણો
પ્રીતિની છલોછલ પ્યાલી.
મ્હેકી રહી મોહક ધરતી
સુખનાં સંવનનો કરતી;
કો ફુલ્લ વદનના ચંદ્રે
ચઢી અંતરસાગર ભરતી.