ધ્વનિ/આપણ ખેતરિયે મંગલ

૩૧. આપણ ખેતરિયે મંગલ

⁠આપણ ખેતરિયે મંગલઃ
⁠ટહુકે મોરા, બાદલ વરસે ઝરમર ઝરમર જલ.
⁠આપણ ખેતરિયે મંગલ.

⁠ધરતીની ધૂળ ઝરતી આજે
⁠મનહર મીઠી ગંધ,
⁠નીલ દાભના અંકુરે શો
⁠હલમલ રે આનંદ!
થલે થલે વહેતાં ઝરણાંનો નાદ રમે કલકલ.

⁠‘હું લાવી એરામણ:’
⁠‘લાવ્યો હું ધોરી ને હલ:’
⁠ભેળી તે મહેનતનાં આપણ
⁠ભેળાં જમશું ફલ.

⁠ધરા-આભને આધારે જે
⁠રંગછટા અંકાઈ
⁠એવાં રે જીવતર હૈયાંને
⁠ઉમંગ રે'શું ગાઈ,
દિનભરનાં ભીંજ્યાં પોઢણિયે ઓઢીશું કંવલ.
આપણ ખેતરિયે મંગલ.
૨૫-૭-૪૯