કાવ્ય-આચમન શ્રેણી – હરિશ્ચન્દ્ર ભટ્ટ/ભણકાર

૩૯. ભણકાર

(અંજની)
ભૂતસમો ભમતો, ફરતો હું,
આંખો આંસુથી ધોતો હું,
હૃદયતંત્રીના તાર તૂટે ને
⁠ઉરમાં એક ઊંડો ભણકાર,
નિર્જન વનમાં સૂની રાતે
અંધારી શીતલતા ઘોરે,
કોઈ જૂના ખંડેર સમો ત્યાં
⁠ એકલ મંત્ર જપું નિરધાર.
વરસી મેઘ પડે વીજળી ને
પ્રાચીન એ ખંડેર પડે ત્યમ
નીરવ રાત્રિ મહીં આ ગાજે
⁠ ઉરમાં એક ઊંડો ધબકાર.
સહૃદય કોઈ મુસાફર આવી
એ ઇતિહાસ નિહાળી રડતા,
એમ દેવી તુજ ભીની આંખો
⁠ આશાકિરણ તણો અંબાર.
ઉરમાં એક ઊંડો ધબકાર –
એકલ મંત્ર જપું નિરધાર –
આશાકિરણ તણો અંબાર –
⁠ ઉરમાં એક ઊંડો ભણકાર.

---

• ૧૨ રદ કરેલ પાઠ : [રિ’શું ઝીલી કનકકિરણ આત્મભાનું.]

૧૭-૨-૧૯૨૮ (‘સ્વપ્નપ્રયાણ’, પૃ. ૨૪૦-૨૪૧)