મંગલમ્/મૈત્રીભાવનું પવિત્ર ઝરણું

મૈત્રીભાવનું પવિત્ર ઝરણું

મૈત્રીભાવનું પવિત્ર ઝરણું, મુજ હૈયામાં વહ્યા કરે,
શુભ થાઓ આ સકલ વિશ્વનું, એવી ભાવના નિત્ય રહે. ૧

ગુણથી ભરેલા ગુણી-જન દેખી, હૈયું મારું નૃત્ય કરે,
એ સંતોના ચરણ-કમલમાં, મુજ જીવનનું અર્ઘ્ય રહે. ૨

દીન, ક્રૂર ને ધર્મ-વિહોણા, દેખી દિલમાં દર્દ રહે,
કરુણા-ભીની આંખોમાંથી, અશ્રુના શુભ સ્રોત વહે. ૩

માર્ગ ભૂલેલા જીવન-પથિકને, માર્ગ ચીંધવા ઊભો રહું,
કરે ઉપેક્ષા એ મારગની, તો સમતા હું ચિત્ત ધરું. ૪

ચંદ્રપ્રભુની ધર્મભાવના, હૈયે સૌ માનવ લાવે,
વેરઝેરનાં પાપ તજીને, મંગલ ગીતો સૌ ગાવે. ૫