સમગ્ર અરધી સદીની વાચનયાત્રા/હસિત બૂચ/ઝિન્દાબાદ, ઝિન્દાબાદ!

ભારતનાં રખવાળાં કરશું,
ભારતમાં અજવાળાં ભરશું :
ઝિન્દાબાદ, ઝિન્દાબાદ!
દેશ અમારો ઝિન્દાબાદ!

મરજીવા થઈ સાગર તરશું,
પવન પલાણી થનગન ફરશું;
અમે ચાંદની,
અમે વાદળી થઈ જગતમાં
મીઠાં મીઠાં અમરત ઝરશું :
ઝિન્દાબાદ.

થાક અમે સ્હેજે ના ગણશું,
પાયાથી નવચણતર ચણશું;
અમે બંસરી,
અમે ખંજરી બની મુલકમાં
મધુર કૂજશું ને રણઝણશું :
ઝિન્દાબાદ.

અમે ગાંધી-ન્હેરુને પગલે
તિરંગાની શાન બઢવશું,
સરોજિની-કસ્તુરબા થઈને
અમે દેશનાં ગાન ગજવશું :
ઝિન્દાબાદ, ઝિન્દાબાદ!
દેશ અમારો ઝિન્દાબાદ!