બાળ કાવ્ય સંપદા/ખુલ્લામાં જઈ રમીએ

ખુલ્લામાં જઈ ૨મીએ

લેખક : રાજેન્દ્ર શાહ
(1913-2010)

ઘરમાં ગોઠે નહીં અમોને,
⁠ખુલ્લામાં જઈ રમીએ;
પંખીના ટહુકે હોકારો દઈ,
⁠અહીં-તહીં ભમીએ.
કાન ઉપરના વાળે પીળાં
⁠આવળનાં ફૂલ ધરીએ;
વાડ-થોરના કાંટા વાગે
⁠ભૂલ કદી જો કરીએ.
પીડા એની નહીં, થાક નહીં,
⁠કોઈ વાત નહીં નડતી;
દિવસ ઊતરી જાય, ન એની
⁠ખબર જરીયે પડતી.
ઘરે આવીએ પાછા, ત્યાં તો
⁠લાગે ભૂખ કકડીને;
દહીં-ઢેબરું મળતાં, મ્હોં પર
⁠સુખ સોહે મલકીને.