કાવ્ય-આચમન શ્રેણી – મનુભાઈ ત્રિવેદી/પંડના છે પડછાયા
એવી અચરજ જેવી માયા,
પંડમાં પંડના છે પડછાયા.
આપે જ હાકોટો માર્યો હાકલનો,
આપ જ ભેભીત ધાયા;
આપે જ એને ધરપત આપી,
આપ જ સંતોષાયા. —
પંડમાં પંડના છે પડછાયા.
કેસરી સિંહ તમે કૂપમહીં કાં
મ્હોરું જોઈ ભરમાયા?
કૂદકો માર્યે કાંઈ ન મળશે,
આપે આપ ઠગાયા.—
પંડમાં પંડના છે પડછાયા.
પડછાયાને પી જવાનો
કસબ કોઈક પાયા;
દાસ સરોદ કહે, પૂરા પીર એ
પંડે પંડ સમાયા.—
પંડમાં પંડના છે પડછાયા.
<div class="wst-center tiInherit " Lua error: Cannot create process: proc_open(/dev/null): Failed to open stream: Operation not permitted> (સુરતા, પૃ. ૧૦૧)