ભૌ-ભૌ વિશે
લેખક : ઉદયન ઠક્કર
(1955)
મૂછ ઊગેલા ડામર જેવું લાગે છે,
આ કૂતરું તો ઉંદર જેવું લાગે છે.
પેટ જુઓ તો ડાબે-જમણે લબડે છે,
ફૂસ થયેલા ટાયર જેવું લાગે છે.
મોઢું એનું સાવ બગાસા જેવું છે,
ચોળાયેલી ચાદર જેવું લાગે છે.
કૂતરાજીએ કોટ ઊલટો પહેર્યો છે,
કપડું ક્યાં છે ? અસ્તર જેવું લાગે છે.
બધાં કૂતરાં ખૂબ શોખથી સૂંઘે છે,
પૂંછડી પાસે અત્તર જેવું લાગે છે.
તમે કહો છો રોડનો ચોકીદાર છે, પણ
આમ જુઓ તો જોકર જેવું લાગે છે.