મંગલમ્/જાગો જાગો જન
જાગો જાગો જન
卐
જાગો જાગો જન
卐
જાગો જાગો જન, જુઓ, ગઈ રાત વહી
રાત વહી ને ભોર ભઈ… જાગો…
હિમડુંગરનાં શિખરો ઝળક્યાં, મરક મરક વનરાઈ થઈ;
સાગર જાગ્યો ભૈરવ રાગે, ઝરણ જલે નવ ઝલક ધરી. જાગો…
દૂરે દૂરે ઝાલર બાજે, ક્યાંક બજી શરણાઈ રહી,
વન ઉપવનમાં ફૂલડાં જાગે, પવન ફરે પમરાટ ભરી. જાગો…
શ્યામલ-વરણી પલટી ધરણી, તેજ તણા શણગાર કરી,
જાગે છે નવ જોમ ગગનમાં, લાલ રંગ સૌ અંગ ધરી. જાગો…
— પ્રહલાદ પારેખ