યોગેશ જોષીની કવિતા/એક (આંબાને પહેલવહેલકા...)

એક (આંબાને પહેલવહેલકા...)

(બ્રેસ્ટ કેન્સરગ્રસ્ત કવયિત્રીની અંગત ડાયરીમાંથી (નવ સંવેદનચિત્રો))

આંબાને
પહેલવહેલકા
મરવા ફૂટે તેમ
મને
સ્તનની કળીઓ ફૂટી
ત્યારે મેં
ડ્રૉઇંગ-બુકમાં
ચિત્ર દોરેલું –
નાની નાની
ઘાટીલી બે ટેકરી
અને વચ્ચે
ઊગતો નારંગી સૂર્ય


Mastectomyના
ઑપરેશન પછી
હવે
એક જ ટેકરી
એકલીઅટૂલી

શોધ્યા કરું છું,
શોધ્યા જ કરું છું –
રાતો સૂરજ...
Mastectomy : કૅન્સરની ગાંઠવાળું આખું સ્તન દૂર કરવામાં આવે.