બાળ કાવ્ય સંપદા/પરીરાણી

પરીરાણી

લેખક : ધર્મેન્દ્ર પટેલ
(1969)

વાદળનું વિમાન લઈને પરીરાણી આવી,
નાનકડાં ભૂલકાંને માટે વાતો મીઠી લાવી.
– વાદળનું વિમાન...

ચાંદાની ધરતીની એ તો વાતો કરતી મીઠી,
હરતીફરતી દુનિયા આખી એણે નજરે દીઠી.
બાળક સહુને ખોળે લઈ, વ્હાલ કરતી માથે,
તારલિયાનો દેશ બતાવે સહુને લઈ સંગાથે.
– વાદળનું વિમાન...

દૂર આભમાં ઊંચે ઊંચે ઊડતી ઊડતી જાતી,⁠
બાળક દેખી પરીરાણી, ગીત મજાનું ગાતી.
સાચી સાચી શીખ દઈને, વાત ન્યારી કરતી,
દુનિયાભરનાં બાલુડાંને, હૈયે આનંદ ભરતી,
– વાદળનું વિમાન....