મર્મર/ઓ મારી ગુજરાત!
Jump to navigation
Jump to search
ઓ મારી ગુજરાત!
ઓ મારી એ ગુજરાત!
ઓ વ્હાલી ગુજરાત!
મા તારું ઉપવન અણમૂલ
અમે મા એ ઉપવનનાં ફૂલ
સમય આવતાં વજ્ર બનીશું, સાચવશું ના જાત!
ઓ મારી ગુજરાત!
આશ્રય આવે બાળ પરાયાં.
તારાં ના કદી થાન સૂકાયાં
ઉદાર ઉર દેવા જે બેઠી તેને શી પર નિજ પંચાત!
ઓ મારી ગુજરાત!
તારો અંક ખૂંદી જે આગળ
આજ ખૂંદે ધરતીની ભાગળ
તે ક્યમ ભૂલે તારી નદીનાં નીર તણી તાકાત?
ઓ મારી ગુજરાત!
જીવવું તારું કામ કરીને
મરવું તારું નામ કરીને સ્મરીને
તારે અંક ઊગો મા! મારા નવજીવનનું પ્હેલું પ્રભાત.
ઓ મારી ગુજરાત!