મંગલમ્/ગીત ગગનનાં ગાશું
Jump to navigation
Jump to search
ગીત ગગનનાં ગાશું
卐
ગીત ગગનનાં ગાશું
卐
ગીત ગગનનાં ગાશું
卐
અમે ગીત ગગનનાં ગાશું
રે! અમે ગીત મગનમાં ગાશું
કલકલ કૂજન સૂણી પૂછશો તમે
અરે છે આ શું? — અમે…
સૂર્ય-ચંદ્રને દિયો હોલવી, ઠારો નવલખ તારા
હથેળી આડી રાખી રોકો, વરસંતી જલધારા
અમે સૂર સરિતમાં ન્હાશું. — અમે…
જુઓ રાત-દિન વિહંગ કોડે કર્યા કરે કલશોર
સાંજ સવારે કોકિલ બુલબુલ,
મોડી રાતે મોર હા…
જંપ્યા વિણ ગાયે જાશું. — અમે…
પંખી માત્રને મુનિવ્રત આપો, ચૂપ કરી દો ઝરણાં
પૂરો બેડીમાં હૃદય હૃદય પર
નર્તન્તાં પ્રભુચરણા હા…
ઉર મૂકી મોકળાં ગાશું. — અમે…
પ્રચંડ જનકોલાહલ વીંધી ઝમે બ્રહ્મરવ ઝીણા
જંપી જાય જગ ત્યારે ગાજે,
તિમિરની અનહદ વીણા હા…
એ રહસ્ય સ્વર કૈં લ્હાશું. — અમે…
બાળક હાલરડાં માગે ને યૌવન રસભર પ્યાલા
પ્રૌઢ ભજન ભણકાર ચહે એ, આપે કોઈ મતવાલા
અમે દિલ દિલને કંઈ પાશું. — અમે…
— ઉમાશંકર જોષી