બાળ કાવ્ય સંપદા/ફરિયાદ

ફરિયાદ

લેખક : મકરન્દ દવે
(1922-2005)

આ દુઃખ અરે! ક્યાં ગાવું?
બોલો, કોને જઈ સમજાવું?

આમ તો ભડભાદર છું મોટો,
સાવજને ફટકારું સોટો,
મારા શિકારનો નહીં જોટો,

નાડી પણ બાંધીય શકું ના,
બેન કને બંધાવું!
⁠આ દુઃખ અરે! ક્યાં ગાવું?

સાત સમુંદર પાર મજાનો,
લીલા બેટે ગજબ ગજાનો,
મારો હો અણખૂટ ખજાનો,

કોડી પણ રમવા માટે તો,
બેન કને મંગાવું!
⁠આ દુઃખ અરે! ક્યાં ગાવું?

ગીચ જંગલે કાળી રાતે,
જાઉં ધસતો એકલ જાતે,
ઘરમાં પણ આ કોઈ વાતે,

બેન વિના ચાલે નહીં ને ભઈ!
અંધારે જ્યાં જાવું!
⁠આ દુઃખ અરે! ક્યાં ગાવું!

બાવન લાખ નગરનું સારું,
રાજપાટ છે સૌથી ન્યારું,

રાજા વિક્રમ નામ અમારું,
બેન કહે છે બબલો એને,
સાચું કેમ સુણાવું!
⁠આ દુઃખ અરે! ક્યાં ગાવું?

બેન હસીને પજવે ભારે,
કોઈ કહે શું કરવું મારે?
ધૂળે રિસાઈ બેસું જ્યારે,

બેન તણા હાથે પણ પાછું,
નીચા નમી નહાવું!
⁠આ દુઃખ અરે! ક્યાં ગાવું.