મર્મર/આનન્દ છે!

આનન્દ છે!

⁠આ સૂર્યનાં કોમળ કિરણનું તેજ,
⁠ને ધરાઉરનો હૂંફાળો હેજ;
⁠ક્યાંક કોકિલનું અચાનક કૂજવું
⁠ને ડાળીઓનું ફૂલભારે ઝૂકવું.
આનન્દ છે! આનન્દ છે! આ ધરતી પર આનન્દ છે!

⁠આ પ્રિયજનોનાં હાસ,
⁠નિર્દોષ શિશુઓનાં રુદનઉલ્લાસ;
⁠શ્રાન્ત તન કેરું દિનાન્તે લેટવું,
⁠ને વિરહ અન્તે સ્વજનનું ભેટવું.
આનન્દ છે! આનન્દ છે! આ ધરતી પર આનન્દ છે!

⁠રાત્રિના અંધારમાં
⁠કોઈનું ચુપચાપ આવી ઊભવું મુજ દ્વારમાં.
⁠સૂણી રહું છું શ્વાસ
⁠તે મારો નથી, તારો જ છે;
⁠તું કેટલો રે પાસ!
આનન્દ છે! આનન્દ છે! આ ધરતી પર આનન્દ છે!