બાળ કાવ્ય સંપદા/બુચ્ચા

બુચ્ચા

લેખક : મહેન્દ્ર રે. ત્રિવેદી
(....)

કોઈની સાથે કિટ્ટા નહીં,
ને બધાંય સાથે બુચ્ચા !
અમે શિશુ સહુ સમાન-સરખાં,
ના કોઈ નીચાં – ઊંચાં !

પ્રેમ મળે ત્યાં દોડી જઈએ,
હેતે હળીએ-મળીએ,
કાલની ચિંતા કદી ન કરીએ,
આજ નિરાંતે ૨મીએ !

રમતાં-રમતાં લડીએ તોયે,
પળમાં ભેટી પડીએ !
તું – તું, હું – હું ક્યાંથી કરીએ –,
મનમાં મેલ ન જરીયે !

ના કોઈ મોટાં, ના કોઈ નાનાં,
ના કોઈ લોભી - લુચ્ચાં !
કિટ્ટા કોઈની કરીએ શાના?
કરીએ સહુની બુચ્ચા !