બાળ કાવ્ય સંપદા/બહેન

બહેન

લેખક : સોમાભાઈ ભાવસાર
(1911-1984)

લાલ ને પીળી, વાદળી લીલી,
કેસરી વળી, જામલી વળી,
રંગબેરંગી ઓઢણી લઉં,
બહેન મારીને ઓઢવા દઉં !

ચંપા, બકુલ, બોરસલી ફૂલ,
માલતી અને મોગરાનાં ફૂલ,
બાગમાંથી હું ચૂંટી જાઉં,
બહેનને વેણી ગૂંથવા દઉં !

સોનીએ ઘડ્યા, રૂપલે મઢ્યા,
નાના નાના ઘૂઘરા ઝીણા,
એવાં બે ઝાંઝરિયાં લઉં,
બહેન મારીને પહેરવા દઉં !

ઓઢણી તમે ઓઢજો બહેની,
ઝાંઝર પગે પહેરજો બહેની,
વેણી માથે બાંધજો બહેની,
છુમ છુમાછુમ, રૂમ ઝુમાઝૂમ,
દિલ ભરી ભરી, બાગમાં ફરી,
સાંજરે ઘરે આવજો બહેન,
ભાઈને સાથે લાવજો બહેન.