મંગલમ્/એક જ અરમાન

એક જ અરમાન

<div class="wst-center tiInherit " >

એક જ અરમાન છે મને, મારું જીવન સુગંધી બને
ફૂલડું બનું કે ભલે ધૂપસળી થાઉં,
આશા છે સામગ્રી પૂજાની થાઉં.
⁠ભલે કાયા આ રાખ થઈ જલે. મારું જીવન…

તડકા છાયા ભલે વર્ષાના વાયા,
તોયે કુસુમો કદી ના કરમાયા;
⁠ઘા ખીલતાં ખીલતાં એ અમે. મારું જીવન…

વાતાવરણમાં સુગંધ ન સમાતી,
જેમ જેમ સુખડ ઓરસિયે ઘસાતું;
⁠પ્રભુ કાજે ઘસાવું ગમે. મારું જીવન…

જગની ખારાશ બધી ઉરમાં સમાવે,
તોયે સાગર મીઠી વર્ષા વરસાવે,
⁠ભલે ભરતી ને ઓટમાં રમે. મારું જીવન…

ગૌરવ મહાન છે પ્રભુ તારું એવું,
ના જગમાં કામ કોઈ એથી અદકેરું,
⁠પ્રભુ હાર્યે ઘસાવું ગમે. મારું જીવન…
⁠એક જ અરમાન છે મને…