કાવ્ય-આચમન શ્રેણી – રામનારાયણ વિશ્વનાથ પાઠક ‘શેષ’/૩૨. આતમરામ

૩૨. આતમરામ
(ભજનના ઢાળે)

હજીયે ન જાગે મારો આતમરામ!
⁠ મારો આતમરામ!
સમુંદર ઘૂઘવે છે દૂર, વાયુ સૂસવે ગાંડોતૂર,
સમજું ન ભરતી કે આ તે આવે છે તૂફાન!
⁠ આ તે આવે છે તૂફાન!
⁠હજીયે ન જાગે મારો આતમરામ!
⁠ મારો આતમરામ!
સઢ સંધા ફડફડે, દોર ધિંગા કડકડે;
હાજર સૌ ટંડેલ એક આ સૂનાં છે સુકાન
⁠ મારાં સૂનાં છે સુકાન!
⁠હજીયે ન જાગે મારો આતમરામ!
⁠ મારો આતમરામ!
વહાણ રાખું નાંગરેલું, વેપાર શી રીતે ખેડું?
સવાયા થાશે કે જાશે મૂળગા ય દામ!
⁠ મારા મૂળગા ય દામ!
⁠હજીયે ન જાગે મારો આતમરામ!
⁠ મારો આતમરામ!
હવે તો થાય છે મોડું વીનવું હું પાયે પડું,
મારો તો થાવા બેઠો છે ફેરો આ નકામ!
⁠ મારો ફેરો આ નકામ!
⁠જાગોજી જાગોજી મારા આતમરામ!
⁠ વ્હાલા આતમરામ!

(શેષનાં કાવ્યો, પૃ. ૧૦૬)