મધ્યકાલીન ગુજરાતી કાવ્યસંપદા/દયારામ પદ (૩૭)

પદ (૩૭)

દયારામ

કાનુડો કામણગારો રે! સાહેલી! આ તો કાનુડો કામણગારો!
કાનુડો કામણગારો, રસભર્યો ને રૂપાળો,
આ શું આંખડલીનો ચોળો રે!          સાહેલી! આ તો કાનુડો.

રંગરાતો, મદમાતો, વાંસલડીમાં ગીત ગાતો,
નેણાંશું કરે છે વાતો રે!          સાહેલી! આ તો કાનુડો.

ભરવા હું ગઈ’તી પાણી, પ્રેમપીડા ભરી આણી,
ઘેલી થઈ હું આવી શાણી રે!          સાહેલી! આ તો કાનુડો.

તેં કહ્યું તે મેં ના માન્યું, આજે મારી જાતે નાણ્યું,
આવડું મેં નો’તું જાણ્યું રે!          સાહેલી! આ તો કાનુડો.

બહેની! તારે પાયે લાગું, વ્હાલાવિના ઘેલું લાગ્યું,
દયાનો પ્રીતમ માગું રે!          સાહેલી! આ તો કાનુડો.