મધ્યકાલીન ગુજરાતી કાવ્યસંપદા /બ્રહ્માનંદ પદ ૧૩

પદ ૧૩

બ્રહ્માનંદ

ઓરા આવોને સુંદર શામ, એકાંતે મળીયેરે;
વ્હાલા દિન જાણીને દયાળ, અઢકળ ઢળીયેરે.

વારી મુરતી તમારી માવ, વસી દિલ મોરેરે;
હું તો જોઈને થઈ ગુલતાન, ફુલાં કેરે તોરેરે.

વ્હાલા તમને મળ્યાના છે કોડ, કરિયે વાતુંરે;
વાલા તમ વિના પલ એક, નથી રેવાતું રે.

તમે દીલડાના દરીઆવ, કે છેલ છોગાળારે;
મારા મનમાં માન્યા મોરાર, છો મરમાળારે.

આવી તમ સાથે અલબેલ, પ્રીત બંધાણીરે;
મુખ લાવણ્યતા જોઈ માવ, હું લોભાણીરે.

તમે મોટા થઈ માહારાજ, શું લલચાવોરે;
વાલા બ્રહ્માનંદના નાથ, હસિને બોલાવો રે.